أوزولا Ozula

أوزولا ← عن أوزولا

عن أوزولا (Ozula)

برنامج اتبنى من شغل حقيقي، مش من قايمة مواصفات.

البداية

أوزولا بدأ عشان شركة مصرية حقيقية كانت بتمشّي شؤون عامليها على ملف إكسل من ٢١ ورقة: الحضور في ورقة، والإجازات في ورقة، والمرتبات في ورقة، وكل شهر بيتنسخ من اللي قبله. الملف كان شغّال — بس محدش كان يقدر يجاوب على سؤال واحد بثقة: «الرقم ده جه منين؟».

البرنامج اتبنى على السؤال ده. كل رقم في كشف المرتب لازم يقدر يقول جه من أنهي واقعة، وبأنهي قاعدة، وكانت سارية إمتى.

مبادئ اتعلّمناها من الاستعمال

• الإلغاء مش المسح. الواقعة المالية مابتتمسحش — بتتلغى بسبب مكتوب، وبتفضل في السجل. القرار بيتغيّر والسند بيفضل.
• كل قاعدة ليها تاريخ. تغيير النهاردة مابيغيّرش الشهر اللي فات.
• القاعدة تتكتب مرة واحدة. نفس القاعدة في مكانين بتفترق، وواحدة منهم بتتصلّح والتانية لأ.
• الحساب بيتشرح. الشاشة بتقول ليه الرقم كده، مش بتعرضه وبس.

مين بيطوّره

أوزولا بيتطوّر في مصر على إيد أيمن نبيل، وبيتجرّب على شغل حقيقي قبل ما يوصل لأي عميل. أي ميزة بتدخل البرنامج بتعدّي على مجموعة فحوص آلية بتتشغّل مع كل نشر، وأي نسخة فحوصها بتفشل مابتوصلش للشركات.

الحالة دلوقتي

البرنامج شغّال ومتاح للشركات المصرية، وفيه ديمو مفتوح بشركة تجريبية كاملة. والشغل مستمر على السلسلة المالية (ملف البنك والقيد المحاسبي) وعلى دورة الشهر الكاملة من الاعتماد للصرف.